2022-02-27

Qətərin paytaxtı Doha şəhərində Xocalı soyqırımı qurbanları anıldı.

Azərbaycan Respublikasının Qətər Dövlətindəki Səfirliyində Xocalı Soyqırımının 30-cu ildönümü münasibətilə anım tədbiri keçirilmişdir.

Tədbirdə Qətərdə yaşayan həmvətənlərimiz, qardaş Türkiyə Respublikasının Qətər Dövlətindəki səfiri Mehmet Mustafa Göksu, eləcə də Türkiyə Səfirliyinin hərbi və doplomatik heyəti, jurnalistlər, elm adamları və yerli ictimaiyyət nümayəndələri iştirak ediblər.
 
Tədbirdə Xocalı soyqırımının qurbanları və Azərbaycanın ərazi bütövlüyü uğrunda qəhrəmancasına şəhid olmuş şəhidlərimizin əziz xatirəsi bir dəqiqəlik sükutla yad edilmiş və ruhlarına dua oxunmuşdur. 

Daha sonra səfir Rəşad İsmayılov çıxışında, Xocalı faciəsinin tarixi aspektləri və beynəlxalq səviyyədə görülən işlər haqqında danışmışdır.

Tədbirdə həmçinin çıxış edən Türkiyənin Qətərdəki səfiri M.M. Göksu Xocalı soyqırım qurbanlarını ehtiramla anaraq xalqımıza belə ağrılı faciənin bir daha yaşanmaması üçün birlik və həmrəylik diləklərinin çatdırmışdır. 

Daha sonra çıxış edən Qətər ictimaiyyətinin nümayəndəsi R.Badavi Xocalı soyqırımı ilə bağlı çıxışını təqdim etmişdir. Tədbirdə çıxış edən Qətərdəki Azərbaycan icmasının üzvlərindən C.Mirzəyeva Xocalıda baş verən hadisələrin üzərindən 30 il keçməsinə baxmayaraq o günün ağrı və acısını ürəklərində hiss etdiklərini qeyd etmiş və dünya ictimaiyyətini həqiqətləri görməyə səsləmişdir. 

Çıxışlardan sonra Xocalı soyqırımı ilə əlaqədar Qətərdə təhsil alan şagirdlər şeir söyləmişdir. Tədbirdə həmçinin Xocalı soyqırımı həqiqətlərini əks etdirən foto sərgi təşkil olunub, kitab və informasiya materialları nümayiş etdirilmişdir.

Arxiv üzrə axtarış