Səfirin müraciəti

Əziz dostlar və ziyarətçilər,

Sizi Azərbaycan Respublikasının Qətər Dövlətindəki Səfirliyinin internet səhifəsində məmnunluqla salamlayıram. Səhifəmizə xoş gəlmişsiniz.

Azərbaycan Respublikası ilə Qətər Dövləti arasında diplomatik münasibətlərin əsası 14 sentyabr 1994-cü ildə qoyulmuş və bu günədək böyük inkişaf yolu keçmişdir. Azərbaycan Respublikasının Prezidenti cənab İlham Əliyev və Qətər Dövlətinin əmiri Əlahəzrət Şeyx Təmim bin Həməd əl Tani arasında dostluq münasibətləri iki ölkənin siyasi əlaqələrinin dərinləşməsində misilsiz rol oynamışdır. İki dövlət arasındakı münasibətlər Prezident İlham Əliyevin 2004-cü ildə Qətər Dövlətinə rəsmi səfəri və Əlahəzrət Şeyx Həməd bin Xəlifə əl-Taninin Azərbaycana rəsmi səfərindən sonra xüsusilə inkişaf etmişdir. 2012-ci ilin mart ayında Əlahəzrət Şeyx Həməd bin Xəlifə əl Taninin Azərbaycana səfəri də əməkdaşlığın genişlənməsində mühüm rol oynamışdır.

Hal-hazırda iki ölkə arasında Birləşmiş Millətlər Təşkilatı, İslam Əməkdaşlıq Təşkilatı və digər beynəlxalq təşkilatlar çərçivəsində sıx əməkdaşlıq əlaqələri mövcuddur. Ümid edirəm ki, yaxın gələcəkdə Azərbaycan ilə Qətər arasındakı əlaqələr real strateji tərəfdaşlığa hədəflənərək daha sürətlə inkişaf edəcəkdir.

Tarixdən məlum olduğu kimi, Azərbaycanda ilk dövlət quruluşları b.e.ə. IX əsrdə başlamışdır. Azərbaycan bəşəriyyətin məskunlaşdığı qədim ərazilərdən biridir, tarixən zəngin mədəniyyəti və təbii sərvətləri ilə tanınır. Azərbaycan xalqı 1918-ci ildə Müsəlman Şərqində ilk demokratik respublikanı yaratmış, lakin bu müstəqillik 1920-ci ilədək sürə bilmişdir. Ölkəmiz 1991-ci ildə müstəqilliyini yenidən bərpa etmişdir.

Qədim İpək Yolu üzərində yerləşərək mədəniyyət və sivilizasiyaların kəsişməsində duran Azərbaycan rəngarəngliyi ilə seçilən zəngin cəmiyyətə malikdir. Müxtəlif etnik və dini qrupları əhatə edən Azərbaycan xalqı azad bazar və sağlam sosial institutlara malik olan müasir və demokratik dövlətçiliyini inkişaf etdirməkdədir.

Azərbaycanın xarici siyasəti ərazi bütövlüyünün bərpasına, trans-regional iqtisadi layihələrin təşviqinə və qlobal təhlükəsizliyin möhkəmlənməsinə töhfə verməyə yönəlmişdir.

Azərbaycan əməkdaşlıq üçün böyük imkanlar yaradır və biz dostlarımızı bu imkanlardan faydalanmağa dəvət edirik. Ölkəmiz haqda daha çox məlumat almaq və Azərbaycanlı tərəfdaşlarla əlaqə qurmağınıza Səfirlik heyəti istənilən yardım göstərməyə hazırdır.

Səhifəmizin əsas məqsədi oxuculara Azərbaycanın siyasi, iqtisadi, investisiya, turizm, tarixi və mədəni həyatında baş verən yeniliklər barədə məlumat verməkdir. Ümid edirəm internet səhifəmiz dərin tolerantlıq, multikulturalizm  və qonaqpərvərlik köklərinə malik nadir ölkə olan Azərbaycan haqda daha çox məlumat almağınıza yardım edəcək. Azərbaycan və Qətər qardaş ölkələri arasında daha da güclü əlaqələr qurmağa hədəflənmiş səfər və tədbirlər barədə yenilikləri izləmək üçün sizi səfirliyin internet, həmçinin sosial şəbəkələrdəki səhifələrini izləməyə dəvət edirik.

Bütün dostlarımızı təbiətimizdən həzz almaq, musiqimizi dinləmək, mətbəximizi dadmaq və ən əsası, yeni dostlar qazanmaq və xalqımızı tanımaq üçün ölkəmizə dəvət edir, Sizi Azərbaycanda görməyə ümid edirəm!

 

Hörmətlə,

Rəşad İsmayılov

Azərbaycan Respublikasının Qətər Dövlətində

Fövqəladə və səlahiyyətli səfiri